الوقت غبى ولا هو قريب ولا هو بعيد والوهم وحيد بنقابله منين مانسافر فى الأيام ونشوفه جديد حافى على نهر بيتمشى وانا بامشى على جمر وبإصرار باسعى لك دايما كما لو كنت بانفذ أمر أمر عبيط وانا أعبط منه سنى فى خوفى قريب منه أنا لسه باسافر ورا قلبى .. فى الدرب الوعر إبيض الشعر وانا باغرف من برميل الوهم لحد القعر وبعشق نفس البنت ونفس الضحكه وبنتقابل على نفس الكازينو وف نفس المواعيد ننزل للنهر المالح نشرب منه جروح وتطير الروح ماتحسش بالمسافات وينقط من فرحتها وجع فوق الطرقات مطرح مامشينا وقلبى .. بيرقص على نغمات أحلامه مطرح ما الشجر اتوجع .. لما حفرت عليه الشوق وكلامه والورق الساقط فوق الأرض.. يقول لى كفايه لو لحظه عقلت ياصاحبى تشوف الآيه وانا برضو مشيت .. لاعقلت ولا اتنصحت وبملو الوهم ف قلبى ضحكت مره الضحكه وفيها جناين .. تطرح ورد أمر لسه باجمع ورد وبابنى .. منه بيوت وبيوت فاكر إن الورد يجيبك من أنياب الموت .
