الأرض لونها من بعيد ..
أحمر
وغرقانة بُكى
نَصَب الشيطان العرش ع المَيَّه
و بيضاجع قُصاد الناس
فتافيت الأمل
تِحبل مُسوخ
وبيزرع الأرض انكسار
تطرح مرار
يظهر مسيخ
ووراه مسيخ
والناس …
ما بين كاهن
وبين واهِن
وبين ممسوخ
بيقايض الأيام على بكرة الأخير
وبيشترى حزن الغلابة بحزن
معدوم الضمير
سوق النخاسة …
الأرض ويَّا العرض متباعة
والتمن مجهول
دبابة بتعدِّى على الأحلام بتفرمها
النخل محنى
والنهار مذلول
وأخينا لسَّاه ف التراس
لابس فنلة حملات
قاعد بيقرا ف التاريخ
مذهول
******
مع كل ليل يقلع عباية الدنيا عن قلبه
ويستسلم لأول حرف
بينادى على روحه اللى عطشانة سفر
يوصل لحد النِّجمة ويدلدل صباع رجله
ويشرب قهوته
بيبص ع الناس اللى قهرتها
أكبر كتييير من كلمته
يحِدِف عليهم فكرته
زخات مطر بتشع حرية
تخبط ف راجل محنى
مش قادر يبص لفوق
يفتح قوام شمسيِّتُه
يشتم بعلو الصوت :
زَمَن أخبر
عيال بايظة ومتربِتش .
*****
يرجع حزين
يرجع وينهى رحلتُه
الفرشة لِسَّاها دَفَا
يحضُن قصيدة نازلا بتوأوأ
يصلِّى ركعتين سُنَّة
ويتبرَّأ مِن الشيطان
ويرجع فرشتُه
وينام
